تھائی لینڈ کی آئینی عدالت نے لیک فون کال پر وزیراعظم کو عہدے سے برطرف کردیا

بینکاک (سب نیوز)تھائی لینڈ کی آئینی عدالت نے کمبوڈیا کے سابق رہنما ہن سین کے ساتھ لیک ہونے والی فون کال کے معاملے پر وزیراعظم پائی تونگ تران شینا وتری کو عہدے سے ہٹا دیا۔
عدالت نے فیصلے میں کہا کہ 39 سالہ شینا وتری نے کمبوڈین رہنما کے ساتھ جون میں ہونے والی ٹیلی فونک گفتگو کے دوران ملکی مفادات پر ذاتی مفادات کو ترجیح دی اور اخلاقی معیارات کی خلاف ورزی کی۔غیر ملکی میڈیا کے مطابق نو رکنی آئینی عدالت نے شینا وتری کو بداخلاقی کا مرتکب قرار دیتے ہوئے برطرف کیا۔
لیک ہونے والی فون کال میں شینا وتری کو ہن سین کو انکل کہتے اور تھائی فوج کے سینئر کمانڈر کو دشمن قرار دیتے ہوئے ڈانٹتے سنا گیا باوجودیکہ کمبوڈیا کے ساتھ سرحدی تنازع جاری ہے۔واضح رہے کہ عدالت نے یکم جولائی کو شینا وتری کو معطل کر کے تحقیقات کا حکم دیا تھا۔2008 کے بعد وہ پانچویں تھائی وزیراعظم ہیں جنہیں عدالتی فیصلے کے ذریعے عہدے سے ہٹایا گیا۔