پنجاب میں تعلیم کے فروغ کیلئے عالمی بینک نے 4کروڑ 79 لاکھ ڈالر کی گرانٹ منظور کرلی

اسلام آباد (سب نیوز)عالمی بینک نے پاکستان کے لیے 4 کروڑ 79 لاکھ ڈالر گرانٹ کی منظوری دے دی ہے، جو پنجاب میں تعلیم کے فروغ اور اسکول سے باہر بچوں کی شمولیت کے لیے خرچ کی جائے گی۔
عالمی بینک کے مطابق یہ فنڈنگ گلوبل پارٹنرشپ فار ایجوکیشن فنڈ کے تحت منظور کی گئی ہے، اس تعلیمی منصوبے سے 40 لاکھ سے زائد بچے مستفید ہوں گے، جن میں پری پرائمری اور پرائمری سطح کے طلبا شامل ہیں۔بینک نے بتایا کہ منصوبے کا بنیادی مقصد بچوں کی ابتدائی تعلیم میں شمولیت کو بڑھانا، اسکول سے باہر بچوں کو دوبارہ تعلیمی نظام میں شامل کرنا اور معذور بچوں کے لیے تعلیم کے نظام کو مضبوط بنانا ہے۔
ورلڈ بینک کے بیان کے مطابق اس منصوبے سے 80 ہزار آٹ آف اسکول بچے اور 1 لاکھ 40 ہزار معذور بچے براہ راست فائدہ اٹھائیں گے جبکہ 30 لاکھ سے زائد سرکاری اسکولوں کے طلبا اور 8.5 لاکھ غیر رسمی تعلیمی اداروں سے وابستہ بچے بھی منصوبے میں شامل ہوں گے۔اس کے علاوہ منصوبے کے تحت 1 لاکھ اساتذہ اور اسکول لیڈرز کو تربیت اور پیشہ ورانہ ترقی کے مواقع بھی فراہم کیے جائیں گے، جس سے تعلیمی معیار میں بہتری آئے گی۔
عالمی بینک کا مزید کہنا ہے کہ یہ منصوبہ نہ صرف پنجاب میں سسٹم ریفارمز کا باعث بنے گا بلکہ صوبے کی پائیدار تعلیمی ترقی میں بھی اہم سنگ میل ثابت ہوگا، یہ اقدام حکومت پنجاب کے تعلیمی اصلاحاتی ایجنڈے سے مکمل طور پر ہم آہنگ ہے۔