خیبر پختونخوا سینیٹ انتخابات، نتائج آنے کا سلسلہ جاری ، پی ٹی آئی 4،اپوزیشن 3جنرل نشستوں پر کامیاب، مراد سعید بھی سینیٹر بن گئے

پشاور(سب نیوز)خیبر پختونخوا اسمبلی میں سینیٹ کی گیارہ نشستوں کے لیے الیکشن ہوئے جس میں نتائج آنے کا سلسلہ جاری ہے۔
غیر حتمی غیر سرکاری نتائج کے مطابق جنرل نشستوں میں پی ٹی آئی نے چار جبکہ اپوزیشن نے تین اپنے نام کیں۔ تحریک انصاف کے مراد سعید کو توقع سے زیادہ 26 ووٹ ملے۔پی ٹی آئی کے دیگر کامیاب ہونے والے امیدواروں میں مرزا آفریدی، فیصل جاوید اور نور الحق قادری ہیں جنہیں بالترتیب، 22 اور 21، 21 ووٹ ملے۔جنرل نشست پر اپوزیشن کے امیدوار مولانا عطا الحق درویش 18 جبکہ طلحہ محمود 17 اور نیاز احمد 18 ووٹ لے کر کامیاب قرار پائے۔
ٹیکنوکریٹ کی نشست پر پی ٹی آئی کے اعظم سواتی اورجے یو آئی ف کے دلاور کامیاب قرار پائے، دونوں نے بالترتیب 89 اور 54 ووٹ حاصل کیے۔خواتین نشست پر پی ٹی آئی کی روبینہ ناز اور پیپلز پارٹی کی روبینہ خالد کامیاب قرار پائیں، غیر حتمی اور غیر سرکاری نتائج کے مطابق پی ٹی آئی کی روبینہ ناز نے 89 اور پیپلز پارٹی کی روبینہ خالد نے 52 ووٹ حاصل کیے۔جبکہ گنتی کے دوران خواتین نشست کے لیے کاسٹ کیے گئے دو ووٹوں کو مسترد کیا گیا۔
الیکشن کمیشن کی فہرست کے مطابق 11 نشستوں کے لیے 25 امیدوار مدمقابل تھے جن میں سے 7 جنرل نشستوں کے لیے 16، ٹیکنوکریٹ کی 2 نشستوں کے لیے 5 اور خواتین کی 2 نشستوں کے لیے 4 امیدوار میدان میں ہیں۔الیکشن کمیشن کی فہرست میں سے بیشتر امیدوار دست بردار ہوچکے ہیں۔ اپوزیشن اور حکومت کے درمیان بلامقابلہ فارمولے کے تحت 6 اور 5 نشستیں اپوزیشن کے کوٹے میں آئیں گی۔بیلٹ پیپر میں پی ٹی آئی کے ناراض امیدوار خرم ذیشان نے کاغذات نامزدگی واپس نہیں لیے تاہم فہرست میں دست بردار ہونے والے ناراض امیدوار عرفان سلیم، وقاص اورکزئی کا نام شامل تھے ۔