ملکی ٹیکس آمدن میں اضافے کیلئے تمام اداروں کو مل کر کام کرنا ہوگا، وزیراعظم

اسلام آباد (سب نیوز)وزیرِ اعظم شہباز شریف نے فیڈرل بورڈ آف ریونیو (ایف بی آر)اور انٹیلی جنس بیورو (آئی بی)کی جانب سے ٹیکس وصولیوں میں اضافے کے لیے کیے گئے موثر اقدامات کو خوش آئند قرار دیتے ہوئے کہا ہے کہ ملکی ٹیکس آمدن میں اضافے کے لیے تمام اداروں کو مل کر کام کرنا ہوگا۔
وزیرِاعظم شہباز شریف کو ایف بی آر اور آئی بی کی جانب سے ٹیکس چوری اور ذخیرہ اندوزی کے خلاف جاری آپریشنز پر تفصیلی رپورٹ پیش کی گئی۔وزیر اعظم کو پیش کردہ رپورٹ میں بتایا گیا کہ آئی بی اور ایف بی آر کی مشترکہ کوششوں سے 178 ارب روپے کی ریکوری ممکن ہوئی، ان اقدامات سے کمپنیوں کے انضمام اور ٹیلی کمیونیکیشن شعبے میں بقایا جات کی مد میں ٹیکس آمدن میں 69 ارب روپے کا اضافہ ہوا۔
رپورٹ کے مطابق اٹیلی جینس بیورو کی جانب سے چینی، جانوروں کی خوراک، مشروبات، خوردنی تیل، تمباکو اور سیمنٹ کے شعبے میں 515 چھاپے مارے گئے، ان کاروائیوں کے نتیجے میں ٹیکس چوری کی کوششوں کو ناکام بناتے ہوئے 10.5 ارب روپے کا اضافی ٹیکس وصول کیا گیا۔اس طرح انٹیلی جینس بیورو نے ذخیرہ اندوزی اور اشیا کی قیمتوں میں مصنوعی طور پر اضافے کی کوششوں کو ناکام بنانے کے لیے چینی، کھاد اور گندم کے شعبوں میں 13 ہزار سے زائد آپریشن کیے اور اپریل 2022 سے اب تک 99 ارب سے زائد کی غیر قانونی طور پر ذخیرہ شدہ اشیا قبضے میں لیں۔
وزیر اعظم نے ٹیکس وصولیوں میں اضافے کے اقدامات کو خوش آئند قرار دیتے ہوئے کہا ملکی ٹیکس آمدن میں اضافے کے لیے تمام اداروں کو مل کر کام کرنا ہوگا، پاکستان کا معاشی استحکام ٹیم کی مشترکہ کوششوں کی بدولت ممکن ہوا، عوام کی خوشحالی کے لیے بھی سب کو مل کر کام کرنا ہے۔شہباز شریف نے مزید کہا کہ پاکستان کے معاشی استحکام میں تمام اداروں کی مشترکہ کوششوں کا کلیدی کردار ہے، معیشت کی ترقی اور عوامی خوشحالی کے لیے بھی ہر ادارے کو اپنی ذمہ داری پوری کرنا ہوگی۔
دوسری جانب وزیراعظم شہباز شریف سے اماراتی ٹیلی کمیونیکیشن کمپنی اتصالات گروپ کے سی ای او حاتم داویدار کی قیادت میں 5 رکنی وفد نے ملاقات کی، اس ملاقات میں وفاقی وزرا اسحاق ڈار، محمد اورنگزیب، شزا فاطمہ خواجہ اور دیگر اعلی افسران شریک تھے۔وزیراعظم نے اتصالات گروپ کو پاکستانی معیشت کے مختلف سیکٹرز میں مزید سرمایہ کاری کرنے کی پیشکش کی اور کہا کہ حکومت تمام ترسہولیات فراہم کرے گی۔شہباز شریف نے کہا کہ یواے ای اور پاکستان کے مابین مشترکہ ثقافت اورمذہبی اقدارپرمبنی دیرینہ تعلقات ہیں، اماراتی کمپنیاں پاکستانی معیشت میں عرصہ درازسے سرمایہ کاری کررہی ہیں، تمام بیرونی سرمایہ کار کمپنیوں کو کاروبار دوست ماحول فراہم کریں گے، سرمایہ کاری کے مزید مواقع فراہم کرنا ہماری اولین ترجیحات میں شامل ہے۔
سی ای او حاتم داویدار نے بہتر کاروباری ماحول کی فراہمی پر وزیراعظم کو خراج تحسین پیش کیا اور کہا کہ اتصالات گروپ پاکستان میں گزشتہ 19 سال سے کامیاب سرمایہ کاری کر رہا ہے، مزید کاروبار اور سرمایہ کاری کا خواہاں ہے، ہماری کمپنی میں 10ہزار سے زائد پاکستانی قابل قدرخدمات سرانجام دے رہے ہیں، ہم پاکستان میں مستقبل کے لیے طویل مدتی اور کامیاب سرمایہ کاری کے لیے پرعزم ہیں۔