امریکی فوج نے گزشتہ ہفتے ایران کے بڑے جوہری مرکز اصفہان پر بنکر بسٹر بم استعمال نہیں کیے کیونکہ یہ مقام زمین کے اتنے اندر واقع ہے کہ عام تباہ کن بم بھی مؤثر ثابت نہ ہوتے۔ یہ انکشاف امریکی جوائنٹ چیفس آف اسٹاف کے چیئرمین جنرل ڈین کین نے جمعرات کو سینیٹرز کو دی گئی ایک بریفنگ کے دوران کیا، جس کی تفصیل سی این این نے تین حاضرین اور ایک باخبر ذریعے کے حوالے سے اپنی رپورٹ میں شائع کی۔
جنرل کین کی یہ وضاحت پہلی بار سامنے آئی ہے کہ امریکی فضائیہ نے اصفہان کے زیرزمین مرکز پر ”Massive Ordnance Penetrator“ بم کیوں استعمال نہیں کیے، حالانکہ یہی مرکز ایران کے 60 فیصد افزودہ یورینیم کے ذخیرے کا مرکز سمجھا جاتا ہے۔ امریکی حکام کے مطابق یہی افزودہ یورینیم ایران کے ممکنہ جوہری ہتھیاروں کے لیے بنیادی مواد ہے۔
امریکی بی-2 بمبار طیاروں نے ایران کے فردو اور نطنز کے جوہری مراکز پر درجنوں بنکر بسٹر بم برسائے، لیکن اصفہان کو صرف امریکی آبدوز سے داغے گئے ٹوماہاک میزائلوں سے نشانہ بنایا گیا۔
یہ خفیہ بریفنگ امریکی وزیر دفاع پیٹ ہیگسیث، وزیر خارجہ مارکو روبیو، سی آئی اے ڈائریکٹر جان ریٹکلف اور جنرل کین کی جانب سے دی گئی۔ جنرل کین کے ترجمان نے اس پر تبصرہ کرنے سے انکار کرتے ہوئے کہا کہ وہ خفیہ کانگریسی بریفنگ پر بات نہیں کر سکتے۔
بریفنگ کے دوران سی آئی اے ڈائریکٹر ریٹکلف نے قانون سازوں کو بتایا کہ امریکی انٹیلیجنس کا خیال ہے کہ ایران کے زیادہ تر افزودہ یورینیم کے ذخائر اصفہان اور فردو میں زیرزمین موجود ہیں۔ ڈیموکریٹ سینیٹر کرس مرفی نے بریفنگ کے بعد بتایا کہ ایران کی جوہری تنصیبات اتنی گہرائی میں ہیں کہ امریکا کے موجودہ ہتھیار وہاں تک پہنچنے سے قاصر ہیں۔
ڈیفنس انٹیلیجنس ایجنسی کی ابتدائی رپورٹ کے مطابق امریکی حملوں کے بعد بھی ایران کے جوہری پروگرام کے بنیادی اجزاء، بشمول افزودہ یورینیم، مکمل طور پر تباہ نہیں ہوئے بلکہ یہ پروگرام صرف چند ماہ کے لیے پیچھے چلا گیا ہے۔ رپورٹ میں یہ بھی اشارہ دیا گیا کہ ممکن ہے ایران نے کچھ افزودہ یورینیم حملے سے قبل ہی دوسری جگہ منتقل کر لیا ہو۔
دوسری جانب صدر ڈونلڈ ٹرمپ نے جمعہ کو ایک بار پھر دعویٰ کیا کہ تینوں جوہری مراکز سے کوئی مواد نہیں نکالا گیا تھا۔ تاہم ریپبلکن ارکان کانگریس نے تسلیم کیا کہ امریکی حملوں میں ایران کا مکمل افزودہ یورینیم ذخیرہ تباہ نہیں کیا گیا، مگر ان کے مطابق یہ مقصد آپریشن کا حصہ ہی نہیں تھا۔
ریپبلکن رکن کانگریس مائیکل مک کول نے کہا کہ ’افزودہ یورینیم کی تنصیبات میں موجودگی کا ہمیں علم ہے، لیکن اس کا خاتمہ اس کارروائی کا مقصد نہیں تھا۔ اصفہان میں جو کچھ بچا ہے، اس کا مکمل حساب کتاب آئی اے ای اے کو دینا ہو گا۔‘
ریپبلکن سینیٹر لنڈسے گراہم نے کہا، ’ہمیں نہیں معلوم کہ 900 پاؤنڈ افزودہ یورینیم کہاں ہے، لیکن وہ حملے کا ہدف نہیں تھا۔ البتہ جن مراکز پر حملے ہوئے، وہ تباہ کر دیے گئے ہیں اور ان کا جلدی استعمال ممکن نہیں۔‘
جوہری ہتھیاروں کے ماہر اور مڈلبری انسٹیٹیوٹ کے پروفیسر جیفری لیوس نے سی این این کو بتایا کہ سیٹلائٹ تصاویر سے ظاہر ہوتا ہے کہ ایران اسفہان کے سرنگی نظام تک دوبارہ رسائی حاصل کر چکا ہے۔ 26 جون کو وہاں متعدد گاڑیاں دیکھی گئیں اور 27 جون کی صبح تک ایک داخلی راستہ رکاوٹوں سے صاف ہو چکا تھا، جس کا مطلب ہے کہ اگر یورینیم اندر موجود تھا تو اب کہیں اور منتقل کیا جا چکا ہو گا۔
سی این این کی رپورٹ کے مطابق، حملوں سے جوہری مراکز کی سطحی تنصیبات کو خاصا نقصان پہنچا ہے، جو شاید ایران کے لیے زیرزمین یورینیم تک رسائی مشکل بنا دے گا۔ سینیٹر کرس مرفی نے کہا، ’ایران اب بھی جانتا ہے کہ جوہری پروگرام کو کیسے دوبارہ جوڑا جا سکتا ہے۔ اگر ان کے پاس مواد، سنٹری فیوجز اور دوبارہ فعال کرنے کی صلاحیت موجود ہے تو ہم نے صرف مہینوں کا نقصان پہنچایا ہے، سالوں کا نہیں۔‘
جنرل کین اور وزیر دفاع ہیگسیث نے اپنی بریفنگ میں کہا کہ فورڈو پر حملہ مکمل منصوبے کے مطابق ہوا، مگر اسفہان اور نطنز پر اثرات کی تفصیل نہیں دی گئی۔
