راولپنڈی(سب نیوز)پی ایچ اے راولپنڈی کی جانب سے سیاحوں کی تفریحی سہولت کے لئے مری شہر کی بیوٹیفیکیشن کے حوالے سے خصوصی اقدامات کئے گئے ہیں،اس حوالے سے مختلف منصوبے مکمل کر لئے گئے ہیں، سجاوٹ،خوبصورت پلانٹرز کی تنصیب اور دیواروں پر خوبصورت ڈیزائن کی کشیدہ کاری کی گئی ہے،ہارٹیکلچر کے حوالے سے بھی شاندار اقدامات کئے گئے ہیں
ڈائریکٹر جنرل پارکس اینڈ ہارٹیکلچر اتھارٹی(پی ایچ اے)راولپنڈی احمد حسن رانجھا نے مری شہر کا خصوصی دورہ کیا، ہارٹیکلچر،سجاوٹ اور موسمی پھولوں کی تزین وآرائش کے منصوبوں کا جائزہ لیا،اس موقع پر انہوں نے متعلقہ عملے کو صفائی،سجاوٹ اور ہارٹیکلچر کے کام میں مزید نکھار لانے کے حوالے سے خصوصی ہدایت بھی دیں، ڈائریکٹر جنرل پی ایچ اے راولپنڈی احمد حسن رانجھا نے مری میں سیاحوں اور مقامی عوام کے لئے شہر کے ماحول کو خوبصورت اور سرسبز بنانے کے لئے نظام مزید بہتر بنانے کی ہدایات دیتے ہوئے کہا کہ مری کو پرفضا مقام کے طور پر برقرار رکھنے اور اسکو مزید خوبصورت بنانے کے لئے تمام وسائل بروئے کار لا رہے ہیں،عوام کو بہترین تفریح کی سہولیات کی فراہمی پی ایچ اے کی ذمہ داری ہے ، اس حوالے سے کسی قسم کی کوتاہی برداشت نہیں کی جائے گی
انہوں نے عملے کو ہدایت کی کہ مری شہر کے تمام اہم پوائنٹس پر سرسبز پودوں اور رنگ برنگے پھولوں کی نگہداشت،کاشت اور سجاوٹ کے انتظامات کو مزید بہتر بنایا جائے،احمد حسن رانجھا نے کہا کہ ملکہ کوہسار مری کو سرسبز بنانا،عوام کو بہترین تفریحی سہولیات کی فراہمی اور صاف ستھرا ماحول فراہم کرنا پی ایچ اے کا عزم ہے، اس حوالے سے عوام کے تعاون کے بھی خواہاں ہیں،
