کراچی (سب نیوز)سندھ کے سیکریٹری داخلہ اور ایڈیشنل چیف سیکریٹری اقبال میمن قومی احتساب بیورو(نیب)کے نشانے پر آ گئے ہیں۔ نیب نے اقبال میمن کو 24جون کو طلب کر لیا ہے، جس میں ان سے مبینہ طور پر اختیارات کے ناجائز استعمال سے متعلق پوچھ گچھ کی جائے گی۔
ذرائع کے مطابق اقبال میمن پر الزام ہے کہ انہوں نے وزیراعلی سندھ کی اجازت کے بغیر متعدد بار یو ٹی پی(انڈر ٹرائل پرزنر)عمران احمد کو پے رول پر رہا کرنے کی منظوری دی۔ذرائع کا کہنا ہے کہ سیکریٹری داخلہ عمران احمد شیخ کو بار بار غیر قانونی طور پر جیل سے رہا کرتے رہے، حالانکہ وہ ایک زیر سماعت ملزم ہے۔مذکورہ یو ٹی پی عمران شیخ محکمہ آبپاشی میں انجینیئر اور کرپشن میں ملوث ہیں۔
ذرائع نے بتایا کہ ملزم کی رہائی سے متعلق رپورٹ بنانے کیلئے نیب کورٹ سے کمیٹی قیام کی اجازت حاصل کرلی گئی ہے، جبکہ احتساب عدالت نے حیدرآباد کے ڈی جی نیب کو ایک مہینے میں رپورٹ جمع کرانے کی ہدایت کی ہے۔سیکریٹری داخلہ کو منگل کو 12 بجے کمیٹی کے روبرو پیش ہونے کا مراسلہ جاری کردیا گیا ہے۔
