اسلام آباد (آئی پی ایس )فیڈرل ایمپلائیز کواپریٹیو ہائوسنگ سوسائٹی کے زیر انتظام جناح گارڈن فیز ون میں لے آئوٹ آئوٹ پلان کی سنگین خلاف ورزیوں پر وفاقی ترقیاتی ادارے(سی ڈی اے )نے نوٹس لے لیا،معاملہ نیب یا ایف آئی اے کو بھیجوانے کا عندیہ،سیکرٹری ہائوسنگ سوسائٹی کو نوٹس جاری کر دیا،لے آئوٹ پلان میں 28خلاف ورزیوں کی نشاندہی کی گئی ہے۔سب نیوز کو دستیاب نوٹس کی کاپی کے مطابق سی ڈی اے نے 2011میں فیڈرل ایمپلائیز کواپریٹیو ہائوسنگ سوسائٹی کے زیر انتظام جناح گارڈن فیز ون کے لے آئوٹ پلان کی منظوری دی۔
سائٹ وزٹ کے دوران منظور کیے گئے لے آئوٹ پلان میں سنگین نوعیت کی خلاف ورزیاں سامنے آئی ہیں۔نوٹس کے مطابق پلے گرائونڈ،گرین ایریا،قبرستان،مختلف گلیوں میں اوپن سپیس کی غیر موجودگی،مسجد،سکول،ہسپتال سمیت دیگر کئی خلاف ورزیاں لے آئوٹ پلان میں پائی گئی ہیں۔نوٹس میں کہا گیا ہے کہ سی ڈی اے انکوائری کیلئے کیس نیب یا ایف آئی اے کو بھیج سکتا ہے۔سکیم کیلئے راہداری روکی جا سکتی ہے۔سوسائٹی کیلئے بلڈنگ پلان کو معطل کیا جا سکتا ہے جبکہ سوسائٹی آفس کو بھی سیل کیا جا سکتا ہے۔سی ڈی اے نے سماعت کیلئے سوسائٹی نمائندگان کو 10دن میں جواب جمع کرانے کی ہدایت کی ہے۔
