برنالہ چھمب(آئی پی ایس) وزیراعظم آزادکشمیر چوہدری انوارالحق نے سیکٹرمناور ،قلعہ چھپڑ، پٹوئیاں،پیرجمال دھینگاوالی ،باندی ،تھب،پتنی، موئیل، کوٹ جیمل، بانیاں،جھنڈا،اپربانیاتھب کیکراں،سنگری نواں چک،پوڑ،کوٹ جیمل،موئیل سمیت بھارتی فائرنگ سے متاثرہ تمام علاقوں کا دورہ کیا،تفصیلی دورے کے دوران انسانی جانوں کے نقصانات دکانوں،گھروں مال مویشی ،روڈ انفراسٹکچر کا جائزہ لیا۔وزیراعظم آزادکشمیر چوہدری انوار الحق کی بھمبر میں ایل او سی سے ملحقہ علاقوں میں حالیہ بلااشتعال بھارتی گولہ باری کے باعث ہونے والے نقصانات کا جائزہ لینے کے دوران میڈیا سے گفتگو کرتے ہوئے کہا کہ مودی کی حالیہ گفتگو مایوس ، ناکام اور شکست خوردہ شخص کی تھی ، ہر بار باتوں سے آپ اپنی عوام کو مطمئن نہیں کرسکتے ، عملی طور پر بھارت شکست خوردہ ہو چکا ہے ،
بھارت کے چند آزاد میڈیا چینلز دیکھا رہے ہیں کہ بھارتی عوام احتجاج کر رہے ہیں اور جانوروں کے گلے میں مودی کی تصاویر لٹکا کر مماثلت کے طور پر مودی پر غصہ کی وجہ سے جانوروں کو تشدد کا نشانہ بنا رہے ہیں ، اللہ پاک کا احسان ہے کہ اس نے میرے لفظوں کی حرمت کا پردہ رکھا ہے ، میں ایکئ سال سے کہہ رہا ہوں کہ مودی اگر تم نے دہشتگردی اور بربریت مقبوضہ جموں و کشمیر میں بند نہ کی تو تمہیں تمہارے گھر میں گھس کر ماریں گے ، اللہ تعالیٰ کے فضل و کرم سے دہلی سے لے کر کشمیر تک ہمارے شاہینوں نے بھارت کو اس کی دہلیز کے اندر گھس کر مارا ہے ، اللہ نے اپنے مجاہدوں کا پردہ رکھا ہے ، اب یہ گفتگو کی جارہی ہے کہ یہ جنگ بندی نہیں سیز فائر ہے ؟
جنگ بندی کر کے آپ نے دیکھ لی ، پھر اگر کوئی خارش باقی ہے تو آنے والے دنوں میں غلطی کی تو خارش دور ہو جائے گی ، آج مسلح افواج پاکستان کی پیشہ ورانہ صلاحیتیں ، مسلح افواج کا عزم اور مسلح افواج پاکستان کے سینے میں بولتا قرآن ہی دراصل آلودگی سے پاک مسلثہ کشمیر پر بیانیے کی بڑی وجہ ہے ،یہ وہی صاف ستھرا اور پاک بیانیہ ہے جس کے بارے میں سپہ سالار پاک فوج جنرل عاصم منیر نے کہا تھا کہ 3جنگیں کشمیر کے لیے لڑی ہیں ، 7اور لڑنے کے لیے تیار ہیں ،اس کے چند ہفتوں بعد چوتھی جنگ فجر کے وقت شروع ہوئی اور عصر ہونے سے قبل ہم نے یہ جنگ جیت لی ، یہ میرے مالک کا خاص کرم ہے ، اس حوالے سے قطعی طور پر پریشان ہونے کی ضرورت نہیں ہے ۔
