کوٹلی میں پیپلز پارٹی کی پاک فوج سے اظہارِ یکجہتی کے لیے تاریخی ریلی

کوٹلی (سب نیوز)صدر پاکستان پیپلز پارٹی آزاد کشمیر چوہدری محمد یٰسین نے پاک فوج سے اظہارِ یکجہتی اور خراجِ تحسین پیش کرنے کے لیے نکالی گئی عظیم الشان ریلی کی قیادت کی۔ اس موقع پر مختلف سیاسی، سماجی و انتظامی شخصیات کے ساتھ عوام کی بڑی تعداد نے شرکت کی۔
ریلی میں وزراء حکومت جاوید اقبال بڈھانوی، چوہدری اخلاق، ملک ظفر اقبال، عامر یٰسین چوہدری، ممبر کشمیر کونسل ملک حنیف، سابق وزیر حکومت ملک محمد نواز، امیدواران اسمبلی ملک محمد یوسف ایڈوکیٹ، سردار آفتاب انجم، سردار ہارون بشیر، چیئرمین ضلع کونسل چوہدری جاوید غفور، پیپلز پارٹی کی ضلعی و تحصیل قیادت، ممبران ضلع و لوکل کونسلز، لوکل گورنمنٹ اور بلدیہ کے چیف افسران، ڈی ای او میل و فی میل، وکلاء، انجمن تاجران، طلباء اور مختلف مکاتبِ فکر سے تعلق رکھنے والے افراد بڑی تعداد میں شریک ہوئے۔
ریلی سے خطاب کرتے ہوئے چوہدری محمد یٰسین نے کہا کہ پاک فوج ہمارا فخر ہے، جس نے دشمن کے ناپاک عزائم خاک میں ملا دیے۔ انہوں نے کہا کہ مودی حکومت اور بھارتی فوج کا غرور توڑنے میں پاک فوج کا کردار ناقابلِ فراموش ہے۔
انہوں نے مزید کہا کہ پاک فضائیہ کے شاہینوں نے دشمن کو اس کی حدود کے اندر جا کر سبق سکھایا، جس پر نہ صرف پاکستان اور آزاد کشمیر بلکہ عالمی دنیا نے بھی سراہا۔ انہوں نے آرمی چیف جنرل سید عاصم منیر، ایئر چیف مارشل، نیول چیف اور تمام افواج پاکستان کو خراجِ تحسین پیش کیا۔