اسلام آباد(سب نیوز) بھارتی جارحیت کے خلاف پاکستانی مسلح افواج کے بھرپور اور مؤثر ردعمل نے دنیا بھر میں عسکری ماہرین کو متاثر کیا ہے۔ معروف بھارتی دفاعی تجزیہ کار اور سابق لیفٹیننٹ جنرل پی آر شنکر نے اعتراف کیا ہے کہ پاکستانی افواج نے چینی جنگی ساز و سامان کا اتنا مؤثر اور شاندار استعمال کیا ہے کہ شاید چین خود بھی ایسا نہ کر پاتا۔
لیفٹیننٹ جنرل پی آر شنکر کا کہنا تھا، “میں پاکستان کی اس مہارت کے پیش نظر پاکستان کے بجائے چین سے لڑنا پسند کروں گا۔” ان کا کہنا تھا کہ پاک فوج نے جس طرح آپریشن “بُنْيَانٌ مرصوص” میں چینی دفاعی ٹیکنالوجی کو بروئے کار لایا، وہ قابلِ ستائش ہے۔
دفاعی ماہرین کے مطابق، بھارتی جنرل کا بیان اس بات کا ثبوت ہے کہ پاکستان کی مسلح افواج نہ صرف پروفیشنل ہیں بلکہ جدید ٹیکنالوجی کے مؤثر استعمال میں بھی عالمی معیار پر پوری اترتی ہیں۔
کامیاب آپریشن “بُنْيَانٌ مرصوص” کی تعریف اب بھارت کے سابقہ اعلیٰ عسکری افسران بھی کر رہے ہیں، جو پاکستان کی عسکری مہارت اور چینی سازوسامان کے بھرپور استعمال کا عملی اعتراف ہے۔
