اسلام آباد (سب نیوز)چیئرمین سی ڈی اے و چیف کمشنر اسلام آباد کا سیکٹرآئی 12کا اچانک دورہ ،ممبر ایڈمن، ممبر فنانس، ممبر پلاننگ، ممبر انوائرمنٹ، ممبر آئی ٹی، ممبر اسٹیٹ، ڈی جی انفورسمنٹ، ڈی جی ورکس، ڈی جی انوائرمنٹ، ڈی جی سینی ٹیشن، پراجیکٹ ڈرایکٹر سیکٹر آئی 12، اسلام آباد انتظامیہ کے اعلی افسران سمیت سی ڈی اے کے دیگر افسران بھی چیئرمین سی ڈی اے کے ہمراہ تھے ۔
اس موقع پر چیئرمین سی ڈی اے نے کہا کہ اسلام آباد کی ترقی و خوشحالی اور سیکٹر ڈویلپمنٹ سی ڈی اے کی اولین ترجیح ہے اور اس حوالے سے تمام دستیاب وسائل بروئے کار لائے جائیں گے، اسلام آباد کو ایک جدید ڈیجٹلائز، سیاحتی اور خوبصورت شہر بنانے کے علاوہ عوام کی رہائشی سہولیات کو پورا کرنے کیلئے نہ صرف سی ڈی اے سیکٹر ڈویلپمنٹ انفراسٹرکچر کی بہتری، بیوٹیفکیشن، تعلیمی اور تفریحی سہولیات کی فراہمی کیلئے تمام توانائیاں صرف کررہا ہے تاکہ عوام کے مسائل کو انکی دہلیز پر حل کرنے میں مدد مل سکے۔ چیئرمین سی ڈی اے نے اپنے دورہ کے دوران سیکٹر آئی 12میں نہ صرف ترقیاتی کاموں کا ذاتی طور پر جائزہ لیا بلکہ موقع پر متعلقہ افسران کو سیکٹر آئی 12میں جاری ترقیاتی کاموں کو مزید تیز کرنے کی ہدایت جاری کی۔
چیئرمین سی ڈی اے نے سیکٹرآئی 12سے ہر قسم کی غیر قانونی تعمیرات اور تجاوزات کو فوری مسمار کرنے اور اراضی واگزار کروانے کی ہدایت کرتے ہوئے کہا کہ سیکٹرآئی 12سے باقی ماندہ کوڑا کرکٹ فوری طور پر اٹھایا جائے تاکہ ترقیاتی کام بروقت مکمل کئے جاسکیں، سیکٹرآئی 12 اسلام آباد اور راولپنڈی کے سنگم پر واقع ہے، سیکٹرآئی 12کی لوکیشن نہ صرف بہترین ہے بلکہ اسلام آباد اور راولپنڈی کے شہریوں کیلئے سیکٹر آئی 12ایک گیٹ وے کی حیثیت رکھتا ہے، سیکٹرآئی 12کے ترقیاتی کاموں میں حائل تمام روکاوٹوں کو ترجیح بنیادوں پر حل کیا جائے۔
