اسلام آباد: پاکستان کی تاریخ میں پہلی مرتبہ صرف 35 دنوں میں انڈر پاس تعمیر کیا جائے گا۔ یہ منصوبہ اسلام آباد ایئرپورٹ سے مری تک سگنل فری کوریڈور کی سہولت فراہم کرے گا، جس سے شہریوں اور سیاحوں کی آمدورفت میں نمایاں آسانی پیدا ہوگی۔
جناح سکوائر مری روڈ انڈر پاس کی کھدائی کا کام تیزی سے جاری ہے اور ریکارڈ مدت میں مکمل کرنے کا ٹاسک دیا گیا ہے۔ وفاقی وزیر داخلہ محسن نقوی نے منصوبے کا دورہ کرتے ہوئے تعمیراتی کام کا جائزہ لیا اور منصوبے کو مقررہ 35 روز میں مکمل کرنے کی سخت ہدایت جاری کی۔
محسن نقوی نے ہدایت کی کہ “سپیڈ کے ساتھ ساتھ معیار کو ہرصورت برقرار رکھا جائے۔” انہوں نے شہریوں کی سہولت کے پیش نظر متبادل راستوں پر ٹریفک کی روانی یقینی بنانے کی بھی تاکید کی۔
محسن نقوی کا کہنا تھا کہ اسلام آباد ایئرپورٹ سے مری تک سگنل فری کوریڈور شہریوں کو آمدورفت میں آسانی فراہم کرے گا، برسوں پرانا ٹریفک جام کا مسئلہ حل ہوگا اور سیاحوں کو مری پہنچنے میں سہولت میسر آئے گی۔
انہوں نے مزید کہا کہ یہ منصوبہ کشمیر چوک کے قریب ٹریفک کے رش کو کم کرنے میں بھی معاون ثابت ہوگا اور شہر میں مجموعی ٹریفک نظام کی بہتری میں اہم کردار ادا کرے گا، ساتھ ہی ایندھن کی بچت بھی ہوگی۔
دورے کے دوران چیئرمین سی ڈی اے محمد علی رندھاوا نے وزیر داخلہ کو منصوبے پر ہونے والی پیش رفت پر بریفنگ دی۔ بریفنگ میں بتایا گیا کہ:
منصوبے میں 479 میٹر طویل انڈر پاس شامل ہے، جسے تین ٹریفک لین کو ایڈجسٹ کرنے کے لیے ڈیزائن کیا گیا ہے۔
منصوبے میں ملحقہ پل کو چوڑا کر کے دونوں اطراف میں دو لین کا اضافہ کیا جائے گا۔
چار ملحقہ سلپ روڈز کو بھی کشادہ کیا جا رہا ہے۔
سٹرکچر اور روڈ نیٹ ورک پر کام تیزی سے جاری ہے۔بریفنگ میں یقین دہانی کرائی گئی کہ: “ان شاء اللہ منصوبے کو مقررہ وقت میں مکمل کیا جائے گا۔”
