اسلام آباد(آئی پی ایس )نیشنل پریس کلب اسلام آباد کے مین کانفرنس ہال کی شاندار افتتاحی تقریب کا انعقاد،افتتاحی تقریب کے مہمان خصوصی پاکستان میں ترکیہ کے سفیر عرفان نذیر اوغلو تھے، ہال کی تزئین و آرائش میں ترک آئی ٹی کمپنی ٹیکانے نیشنل پریس کلب سے خصوصی تعاون کیا ہے،تقریب کا آغاز تلاوت کلام پاک سے ہوا جسکی سعادت پاکستان کیمعروف قاری سید صداقت علی نے حاصل کی،تقریب کی نظامت کے فرائض سیکرٹری نیشنل پریس کلب و چیئرپرسن ویمن جرنلسٹس کاکس نیئر علی نے سرنجام دیئے
اس موقع پر ترکیہ کے سفیر عرفان نذیر اوغلو کا نیشنل پریس کلب کے مین ہال کی شاندار افتتاحی تقریب کے انعقاد پر مبارکباد پیش کرتے ہوئے کہنا تھاکہ ٹیکا پاکستانی بھائیوں کی خدمت میں مصروف عمل ہے، نیشنل پریس کلب اور ٹیکا کے اشتراک سے مین کانفرنس ہال کی تزئین و آرائش عالمی معیار کی ہے جسکے لئے دونوں ادارے مبارکباد کے مستحق ہیں،نیشنل پریس کلب اپنے ممبران کیلئے گرانقدر خدمات سرانجام دے رہا ہے جو کہ قابل تحسین ہے، پاکستان اور ترکیہ کے عوام کے درمیان مضبوط برادرانہ تعلقات ہیں اور وہ ہمیشہ دکھ سکھ کے موقع پر اکٹھے کھڑے رہے ہیں، مشکل کی گھڑی پاکستان پر آئی ہو یا ترکیہ پر، دونوں ممالک نے ایک دوسرے کا ساتھ کبھی نہیں چھوڑا۔ تقریب سے اپنے خطاب میں ٹیکا کے ہیڈ آف ڈیپارٹمنٹ ڈورسن علی نے کہا کہ پاکستان اور ترکیہ کی دوستی بے مثال ہے،انہوں نے نیشنل پریس کلب اور تیکا کے درمیاں تعاون کو فروغ دینے کے عزم کا اعادہ بھی کیا
پی ایف یو جے کے صدر افضل بٹ نے مین کانفرنس ہال کی تزئین و آرائش کیلئے تعاون کرنے پر ٹیکا کی ٹیم کا شکریہ ادا کیا اور کہا کہ یہ این پی سی کی موجودہ باڈی اور بالخصوص سینئر نائب صدراحتشام الحق کا قابل فخر کارنامہ ہے،نیشنل پریس کلب کے قیام سے لیکر آج تک اسکی تعمیر و مرمت میں سابق صدور طارق چوہدری، شکیل انجم اور انور رضا کا کردار بھی اہم ہے، صدر این پی سی اظہر جتوئی نے ٹیکا کا شکریہ ادا کرتے ہوئے کہا کہ ہماری کوشش رہی ہے کہ اپنے ممبران کو بہترین اور عالمی معیار کی سہولیات فراہم کر سکیں اور مین کانفرنس ہال کی تزئین و آرائش اس کی زندہ مثال ہے جسکے لئے تعاون کرنے پر ٹیکا کے خصوصی طور پر شکر گزار ہیں،سیکرٹری این پی سی نیرعلی نے کہا کہ آج جڑواں شہروں میں بسنے والے صحافیوں کیلئے تاریخی موقع ہے کہ ٹیکا کے تعاون سے عالمی معیار کا کانفرنس ہال پایہ تکمیل تک پہنچا ہیجسکے لئے ہم ٹیکا کی ٹیم کے شکر گزار ہیں،انہوں نے سینئر صحافی اور شاعر سجاد لاکھا کی عظیم ترکوں کی بہادری پر لکھی نظم بھی پڑھ کر سنائی
این پی سی کے سینئرنائب صدرحتشام الحق نے ترکی کے سفیر، ترکی کی حکومت،ترکی کے عوام اور ٹیکا کے سربراہ محسن بے کا نیشنل پریس کلب میں ان کی گراں قدر خدمات پر تہہ دل سے شکریہ ادا کرتے ہوئے کہا کہ اسلامیہ یونیورسٹی پشاور سے لے کر جی سی یونیورسٹی لاہور، راولپنڈی کی ویمن یونیورسٹی اور راولپنڈی میں سرکاری شعبے میں پہلا پالتو جانوروں کا کلینک سمیت ملک بھر میں متعدد منصوبوں میں ان کی انتھک کاوشوں نے اہم کردار ادا کیا ہے۔ پاکستان میں اپنے تین سالہ دور میں انہوں نے 70 سے زائد منصوبے کامیابی سے مکمل کیے ہیں۔محسن بے کی لگن اور محنت کی بدولت گزشتہ چند ماہ کے دوران ٹی آئی کے اے پاکستان میں صحافیوں کے درمیان گھر گھر میں مشہور ہو گیا ہے،صدر پی ایف یو جے افضل بٹ، صدر این پی سی اظہر جتوئی ، سیکرٹری نیئر علی اور فنانس سیکرٹری وقار عباسی نے معزز مہمانوں کو یادگاری شیلڈز پیش کیں، بعد ازاں معزز مہمانوں نے این پی سی لان میں پودے لگائے۔
