اداکارہ صبا قمر یونیسیف پاکستان کی بچوں کی فلاح و بہبود کی پہلی قومی سفیر مقرر

کراچی(آئی پی ایس ) اقوام متحدہ کے بچوں کی فلاح و بہبود کے ادارے یونیسیف نے پاکستانی اداکارہ صبا قمر کو ملک کا پہلا بچوں کا قومی سفیر تعینات کردیا ہے۔
صبا قمر نے اپنی انسٹاگرام پوسٹ میں بچوں کے ساتھ گزارے گئے لمحات کی تصاویر شیئر کرتے ہوئے لکھا ہے کہ اس ہفتے کچھ انتہائی حیرت انگیز لوگوں سے ملاقات ہوئی اور کچھ شاندار تجربات ہوئے۔ شیئر کرنے کیلیے بہت ساری کہانیاں ہیں،مزید جلد۔
صبا قمر نے یونیسیف کے پلیٹ فارم سے بچوں کی فلاح و بہبود کیلیے کام جاری رکھنے کے عزم کا اعادہ کرتے ہوئے عالمی ادارے کا شکریہ بھی ادا کیا۔واضح رہے کہ یونیسیف کی جانب سے پاکستان میں پہلی بار بچوں کی فلاح و بہبود کیلیے قومی سفیر کی تعیناتی کی گئی ہے۔
بچوں کی فلاح و بہبود کی سفیر کی حیثیت سے صبا قمر ملکی و عالمی سطح پر مختلف پلیٹ فارمز میں یونیسیف کے تحت بچوں کے مسائل کو سامنے لائیں گی۔صبا قمر اپنی سوشل میڈیا پوسٹس اور ڈراموں میں بھی بچوں اور خواتین پر تشدد اور ان کے استحصال کے خلاف آواز اٹھاتی رہی ہیں۔