اسلام آباد (سب نیوز )ججز کے ملنے والے دھمکی آمیز خط کے معاملے پر اسلام آباد ہائیکورٹ کا فل کورٹ اجلاس ختم ہوگیا۔چیف جسٹس عامر فاروق کی زیرصدارت فل کورٹ اجلاس ہوا، جس میں اسلام آباد ہائیکورٹ کے تمام ججز اور رجسٹرار ہائیکورٹ شریک ہوئے۔سپریم جوڈیشل کونسل کو خط لکھنے والے 6 ججز بھی اجلاس میں شریک ہوئے، جس میں جسٹس محسن اختر کیانی، جسٹس طارق جہانگیری، جسٹس بابر ستار، جسٹس سردار اعجاز اسحاق، جسٹس ارباب محمد طاہر اور جسٹس ثمن رفعت امتیاز شامل ہیں۔
اسی طرح خط پر دستخط نہ کرنے والے جسٹس میاں گل حسن اورنگزیب بھی اجلاس میں شریک ہوئے۔عدلیہ میں خفیہ اداروں کی مبینہ مداخلت اور اثرانداز ہونے پر 6 ججز نے سپریم جوڈیشل کونسل کو خط لکھ دیافل کورٹ اجلاس میں عدلیہ میں حساس ادارے کی مداخلت روکنے کے حوالے سے تجاویز زیر غور آئیں۔یاد رہے کہ سپریم کورٹ کے احکامات کی روشنی میں ہائیکورٹ ججز پہلے ہی اپنی تجاویز جمع کرا چکے ہیں۔
واضح رہے کہ 3 اپریل کو اسلام آباد ہائیکورٹ کے 6 ججز کے خط پر سپریم کورٹ کے از خود نوٹس پر سماعت کے دوران چیف جسٹس قاضی فائز عیسی نے ریمارکس دیے کہ عدلیہ کی خود مختاری پر سمجھوتہ نہیں کریں گے، ہوسکتا ہے آئندہ سماعت پر فل کورٹ تشکیل دے دیں۔ واضح رہے چیف جسٹس قاضی فائز عیسی نے اسلام آباد ہائیکورٹ کے 6 ججز کے خط کا ازخود نوٹس لیتے ہوئے 7 رکنی لارجر بینچ تشکیل دیا تھا۔
