چیئرمین پی ٹی آئی کی گرفتاری: شاہ محمود قریشی کا بیان سامنے آ گیا

چیئرمین پاکستان تحریک انصاف (پی ٹی آئی) کی گرفتاری پر پارٹی کے وائس چیئرمین شاہ محمود قریشی کا بیان سامنے آ گیا ہے۔
نوتشہ خانہ کیس کا فیصلہ آنے کے بعد میڈیا سے گفتگو کرتے ہوئے پی ٹی آئی کے وائس چیئرمین شاہ محمود قریشی نے کہا کہ سیشن عدالت کا فیصلہ سیاسی دکھائی دے رہا ہے۔
شاہ محمود قریشی کا کہنا تھا کہ توشہ خانہ کیس کے فیصلےکے پیچھے سیاسی محرکات نظر آرہے ہیں، کیا ہمارے نظام میں کوئی اور جج نہیں تھا جو کیس سنتا؟۔
وائس چیئرمین شاہ محمودقریشی نے مزید کہا کہ فیصلے کے فوری بعد پولیس زمان پارک پہنچ گئی ہے، کیا پولیس کو فیصلے سے متعلق پہلے سے معلوم تھا؟۔
شاہ محمودقریشی نے کہا کہ پولیس اتنی عجلت میں کس مقصد کیلئے پہنچی؟ ہمارے پاس جتنے آپریشنز موجود ہیں ان کو استعمال کیا جائے گا، مشاورت کے بعد آگے کا لائحہ عمل طے کریں گے، کور کمیٹی اجلاس بلا کر آئندہ کا لائحہ عمل طے کریں گے۔
واضح رہے کہ اسلام آباد میں سیشن کورٹ نے توشہ خانہ کیس میں محفوظ فیصلہ سناتے ہوئے چیئرمین پی ٹی آئی کو 3 سال قید کی سزا سنادی گئی اور ایک لاکھ جرمانہ عائد کر دیا، انھیں 5 سال کے لیے الیکشن ایکٹ کے تحت نا اہل بھی قرار دے دیا گیا ہے۔
عدالت نے توشہ خانہ کیس میں چیئرمین پی ٹی آئی کے وارنٹ گرفتاری بھی جاری کیے جس پر انھیں لاہور میں زمان پارک سے گرفتار کر کے کوٹ لکھپت جیل منتقل کر دیا گیا ہے۔