پشاور ہائیکورٹ بار کا لطیف آفریدی قتل کا مقدمہ لڑنے کا فیصلہ

پشاورہائیکورٹ بار ایسوسی ایشن کا معروف قانون دان لطیف آفریدی کے قتل کا کیس لڑنے کا فیصلہ کرلیا۔
اس ضمن میں ہائیکورٹ بار ایسوسی ایشن نے لطیف آفریدی کیس کے لئے وکلا کی 6 رکنی ٹیم ترتیب دے دی۔
ہائیکورٹ بار ایسوسی ایشن کی طرف سے 6 رکنی ٹیم کا اعلامیہ جاری کیا گیا ہے، اس میں عبدالفیاض، حسین علی، بیرسٹر عامر چمکنی، شبیر حسین گگیانی، محمد سعید خان اور اسفند یار شامل ہیں۔
پشاورہائیکورٹ بار ایسوسی ایشن کے مطابق وکلا کی یہ ٹیم ٹرائل کورٹ سے لے کر سپریم کورٹ تک کیس کی پیروی کرے گی۔
واضح رہے کہ 16 جنوری 2023 کو سابق صدر سپریم کورٹ بار ایسوسی ایشن عبدالطیف آفریدی کو پشاور ہائیکورٹ کے بار روم میں فائرنگ کر کے قتل کر دیا گیا تھا۔
زخمی سینئر قانون دان کو وکلا نے اٹھا کر گاڑی میں ڈالا اور اسپتال منتقل کیا تاہم وہ جانبر نہ ہو سکے۔
ملزم کو موقع پر ہی گرفتار کر کے اس کے قبضے سے آلہ قتل برآمد کر لیا گیا تھا۔
گزشتہ روز پشاور کی عدالت نے عبدالطیف آفریدی قتل کیس کے ملزم عدنان کو 2 روزہ جسمانی ریمانڈ پر پولیس کے حوالے کیا تھا۔