Monday, April 22, 2024
ہومپاکستانکسی کو مایوسی دیکھنی ہے تومولانا فضل الرحمان کی تصویر دیکھ لے، اپوزیشن پارٹیاں ضم ہو کر ایک جماعت بنا لیں ،فواد چوہدری

کسی کو مایوسی دیکھنی ہے تومولانا فضل الرحمان کی تصویر دیکھ لے، اپوزیشن پارٹیاں ضم ہو کر ایک جماعت بنا لیں ،فواد چوہدری

لاہور،وفاقی وزیر سائنس وٹیکنالوجی فواد چوہدری نے کہا ہے کہ کسی کو مایوسی دیکھنی ہے تو وہ مولانا فضل الرحمان کی تصویر دیکھ لے۔

اداکار شان کی والدہ کی تعزیت کے موقع پر میڈیا سے بات کرتے ہوئے وفاقی وزیر سائنس وٹیکنالوجی فواد چوہدری کا کہنا تھا کہ پی ڈی ایم کو سمجھ نہیں آرہی کہ انہیں کرنا کیاہے، مریم نواز اور بلاول بھٹو کی آنکھوں سے مایوسی جھلک رہی ہے، اگر کسی نے مایوسی دیکھنی ہے تو وہ مولانا فضل الرحمان کی تصویر دیکھ لے۔ جن کی وجہ سے آج پاکستان کو یہ دن دیکھنا پڑرہا ہے وہ ہمیں آج مشورے دے رہے ہیں، وہ لوگ مہنگائی کی بات کر رہے ہیں جن کی وجہ سے عوام بیمار ہوئے، مریم نواز اور بلاول بھٹو بتائیں وہ ایسا کیا کریں گے جو پچھلے تیس سال میں نہیں کرسکے، ان کی کوشش ہے عدالتوں سے انہیں ریلیف مل جائے۔فواد چوہدری کا کہنا تھا کہ پی ڈی ایم کے پاس کوئی منصوبہ نہیں ہے، حکومت اپوزیشن کو دیوار سے نہیں لگانا چاہتی ہے، لیکن پی ڈی ایم مولانا کے مدرسے کے بچوں کے ذریعے احتجاج کرنا چاہتی ہے، اور فرقہ واریت پر مبنی جماعتوں کو ساتھ ملانا چاہتی ہے، اپوزیشن حکومت کو بلیک میل کرنے کی کوشش نہ کرے، مولانا آئیں اور الیکشنز میں حصہ لیں، دھرنے کے لئے چھوٹا سا ٹینٹ تو ہم ہی لگوا دیں گے۔وفاقی وزیر نے کہا کہ اپوزیشن سے رابطے تو رہتے ہیں، لیکن رابطے کرنے والے پتہ نہیں مریم کو بتاتے بھی ہیں یا نہیں، مریم بی بی کا پارٹی میں کوئی بڑا قد نہیں ہے ، ان کی بات تو کوئی پارٹی میں بھی سیریس نہیں لیتے، استعفے ایوان میں پہنچنے پرلیگی کارکان اسپیکر کے پاں میں بیٹھ گئے۔فواد چوہدری کا کہنا تھا کہ وفاق نے 16 سو ارب روپے کراچی کے لئے دیا لیکن پتہ نہیں وہ پیسہ کہاں لگایا گیا، پیپلزپارٹی اندرون سندھ کی پارٹی بن گئی ہے، آصف زرداری نے پارٹی کا بیڑہ غرق کردیا ہے، وہ کام ضیا الحق نہ کرپائے جو پارٹی کے ساتھ زرداری نے کیا، مسلم لیگ (ن) بھی ختم ہو گئی ہے، مشورہ ہے کہ سب مل کر مولانا فضل الرحمان کی قیادت میں ایک پارٹی بنا لیں۔