ممبئی: بالی ووڈ سپر اسٹار امیتابھ بچن نے گزشتہ شب بھارتی ٹیم کی مایوس کن کارکردگی دیکھتے ہوئے پاکستان کی اننگز سے قبل ٹی وی بند کردیا تھا۔ ٹیم انڈیا کی شکست بگ بی کو یقینی دکھائی دے رہی تھی۔
میڈیا رپورٹس کے مطابق سوشل میڈیا پلیٹ فارم ایکس پر اپنے ہینڈل سے انہوں نے بھارتی میڈیم پیسر جسپریت بُمرا کی تصویر شیئر کرتے ہوئے لکھا کہ جب بھارتی ٹیم کی اننگز ختم ہوئی تو ہم مایوس ہوگئے تھے اور یہ سوچ کر ٹی وی بند کردیا تھا کہ اب کہاں جیت ممکن ہوگی۔
بگ بی نے مزید لکھا کہ میں نے انٹرنیٹ دیکھا تو وہاں بھارتی ٹیم کی فتح کا جشن منایا جارہا تھا۔ ہم نے دوبارہ ٹی وی آن کیا اور قوم کی خوشیوں میں شریک ہوئے۔ انہوں نے مزید لکھا کہ ہمیں لگا ہار تو گئے ہیں، اب کیا دیکھنا۔ مگر باپ رے باپ، ہم تو جیت گئے۔
