اسلام آباد(آئی پی ایس ) فیڈرل بورڈ آف ریونیو (ایف بی آر)نومبر میں ٹیکس وصولی کا ماہانہ ہدف حاصل کرنے میں ناکام رہا۔فیڈرل بورڈ آف ریونیو کی نومبر کی کارکردگی سامنے آگئی۔
حکام کا کہنا ہے کہ نومبر کے لیے ایک ہزار 34 ارب روپے کا ہدف رکھا گیا تھا۔ذرائع کے مطابق نومبر میں 878 ارب روپے کی ٹیکس وصولی ہوسکی۔ اور اس طرح نومبر کا ٹیکس وصولی کا شارٹ فال 156 ارب روپے رہا۔ ایک دن میں شارٹ فال میں تقریبا 5 ارب روپے کی کمی متوقع ہے۔دسمبر میں ٹیکس وصولی کا ہدف ایک ہزار 406 ارب روپے مقرر ہے۔
رواں مالی سال کے پہلے 5 ماہ میں ٹیکس وصولی 5 ہزار 83 ارب روپے کے ہدف کے مقابلے میں 4 ہزار 715 ارب روپے تھی۔حکام کا کہنا ہے کہ ایف بی آر کو مجموعی طور پر 413 ارب روپے کے شارٹ فال کا سامنا ہے۔ ٹیکس وصولی کے ہدف تک پہنچنے کے لیے آج بھی دفاتر کھلے رہے۔ ایف بی آر حکام ہدف تک پہنچنے کے لیے پرعزم ہیں۔
