ابوظہبی: رائل چیمپس نے شاندار کارکردگی کا مظاہرہ کرتے ہوئے ٹیبل ٹاپرز کوئٹہ کیولری کو 14 رنز سے شکست دے کر اُن کے مسلسل فتوحات کے سفر کا خاتمہ کر دیا۔ اس کامیابی کے باوجود کوئٹہ کیولری، ایسپن اسٹیلینز اور عجمان ٹائٹنز پلی آف مرحلے کے لیے کوالیفائی کر چکے ہیں۔
رائل چیمپس نے پہلے بیٹنگ کرتے ہوئے 111 رنز بنائے۔ وشین ہالامباگے نے آل راؤنڈ کارکردگی دکھاتے ہوئے 19گیندوں پر 41رنز اسکور کئے اور9 رنز کے عوض ایک وکٹ بھی حاصل کی۔ برینڈن مک مولن نے بھی 13 گیندوں پر 22 رنز کی تیز اننگز کھیلی، جبکہ ڈینیئل سیمز نے 7 گیندوں پر 20 رنز جوڑ کر ٹیم کا اسکور مستحکم کیا۔کوئٹہ کیولری کی جانب سے جارج سکرمشا نے آخری اوور میں شاندار بولنگ کرتے ہوئے 28 رنز کے عوض 3 وکٹیں حاصل کیں اور رائل چیمپس کو111رنز تک محدود کیا۔ہدف کے تعاقب میں کوئٹہ کیولری کی اننگز کا آغاز مشکلات سے ہوا۔ لیام ڈاؤسن نے ایون لوئس اور عرفان خان کی اہم وکٹیں حاصل کرکے کیولری کے بیٹنگ بیلنس کو نقصان پہنچایا۔
تاہم اینڈریز گوس نے 33 گیندوں پر 62 رنز کی ناقابلِ شکست فائٹنگ اننگز کھیل کر ٹیم کو سنبھالنے کی کوشش کی جس میں سات چوکے اور دو چھکے شامل تھے۔لیام لیونگسٹون (14) اور خواجہ نافع قابلِ ذکر کارکردگی نہ دکھا سکے۔ اعظم خان نے 10 رنز بنا کر گوس کا ساتھ دیا اور دونوں کے درمیان 42 رنز کی شراکت بنی، مگر مطلوبہ رن ریٹ بہت زیادہ ہو چکا تھا۔ مقررہ 10 اوورز میں کوئٹہ کیولری چار وکٹوں کے نقصان پر97رنز تک محدود رہی اور میچ 14 رنز سے ہار گئی۔پہلی اننگز میں عبدالغفار نے شاندار بولنگ کرتے ہوئے جیسن روئے اور کوئنٹن سیمپسن کو آؤٹ کیا جبکہ عمر لوہیا نے ایرون جونز کی اہم وکٹ حاصل کی، جس سے رائل چیمپس 3.1 اوورز میں صرف 15 رنز پر 3 کھلاڑیوں سے محروم ہو گئی تھی۔
