اسلام آباد(سب نیوز)وفاقی دارالحکومت اسلام آباد کو اسمارٹ سٹی بنانے کیلئے جدید ٹریفک مینجمنٹ نظام اور ڈیجیٹل پارکنگ کے حوالے سے چیف کمشنر اسلام آباد و چیئرمین کیپیٹل ڈویلپمنٹ اتھارٹی (سی ڈی اے)محمد علی رندھاوا کی زیر صدارت جمعرات کے روز سی ڈی اے ہیڈکوارٹرز میں اہم اجلاس منعقد ہوا۔ جسمیں آئی جی اسلام آباد پولیس سید علی ناصر رضوی سی ڈی اے بورڈ کے ممبر ایڈمن طلعت محمود، ممبر پلاننگ و ڈیزائن ڈاکٹر خالد حفیظ، ممبر فنانس طاہر نعیم، اسلام آباد پولیس، چیف آفیسر ایم سی آئی سمیت سی ڈی اے اور محکمہ ایکسائز اینڈ ٹیکسیشن کے سنئیر افسران نے شرکت کی۔
اجلاس کو بریفنگ دیتے ہوئے بتایا گیا کہ وفاقی وزیر داخلہ محسن نقوی کی ہدایت کے مطابق شہر بھر میں گاڑیوں پر ایم ٹیگ لگانے کا عمل تیزی سے جاری ہے۔ اجلاس کو بتایا گیا کہ اس سلسلہ میں وفاقی دارالحکومت اسلام آباد میں ابتک 35000 سے زائد گاڑیوں پر ایم ٹیگ لگائے جاچکے ہیں۔اجلاس کو بتایا گیا کہ شہر بھر میں مختلف مقامات پر شہریوں کی سہولیات کو مدنظر رکھتے ہوئے 10 پوائنٹس قائم کئے گئے ہیں اور شہریوں کی مزید آسانی کیلئے ایم ٹیگ کائونٹرز کی تعداد بدستور بڑھائی جارہی ہے۔ اسی طرح گاڑیوں کی موثر نگرانی کیلئے ایم ٹیگ کے نظام کو اسلام آباد سیف سٹی پراجیکٹ کے ساتھ بھی منسلک کیا جائے گا۔چیئرمین سی ڈی اے محمد علی رندھاوا نے کہا کہ اسلام آباد میں ڈیجیٹل پارکنگ اور ٹریفک کے مسائل کے حل کیلئے جدید ٹیکنالوجی اور مصنوعی ذہانت کا استعمال عمل میں لایا جائے۔
انہوں نے کہا کہ اسلام شہر میں ڈیجیٹل پارکنگ کی سہولیات شہریوں کو جدید موبائل ایپلیکیشن کے ذریعے بھی میسر کی جائیں۔آئی جی اسلام آباد پولیس سید علی ناصر رضوی نے کہا کہ اسلام آباد شہر کو سیف سٹی سے سمارٹ سٹی میں تبدیل کرنے کیلئے مختلف اقدامات اٹھائے جارہے ہیں۔ انہوں نے کہا کہ اسلام آباد سیف سٹی پراجیکٹ کے تحت ای-چالان نظام پر بھی تیزی سے عمل کیا جارہا ہے۔چیئرمین سی ڈی اے نے کہا کہ ان اقدامات کے باعث اسلام آباد ایک جدید ترین ڈیجیٹل اور اسمارٹ سٹی میں بدل پائے گا۔ انہوں نے کہا کہ ٹریفک اور پارکنگ کے مسائل پر قابو پانے سے شہریوں کو وقت اور ایندھن دونوں کی بچت ہوگی۔ چیئرمین سی ڈی اے نے مزید کہا کہ ان اقدامات کا مقصد شہریوں کو جدید ٹریفک کے نظام اور پارکنگ کی بہترین سہولیات کی فراہمی کو یقینی بنانا ہے۔
