ایس این جی پی ایل نے اپنی تاریخ کا دوسرا بلند ترین منافع کا اعلان کر دیا، 30فیصد کیش ڈیویڈنڈ کی منظوری

لاہور(سب نیوز)سوئی نادرن گیس پائپ لائنز لمیٹڈ (ایس این جی پی ایل )نے مالی سال 2025-2024 کے لیے کارپوریٹ تاریخ کا دوسرا بلند ترین منافع حاصل کرنے کا اعلان کر دیا۔ یہ اعلان جمعرات، 27 نومبر 2025 کو لاہور کے پرل کانٹینینٹل ہوٹل میں منعقد ہونے والی کمپنی کی 61ویں سالانہ اجلاس عام میں کیا گیا۔
حصص داران نے 30 جون 2025 کو ختم ہونے والے مالی سال کے سالانہ پڑتال شدہ مالیاتی گوشواروں کی توثیق کر دی۔ کمپنی نے 24,446 ملین روپے منافع قبل از ٹیکس اور 14,592 ملین روپے منافع بعد از ٹیکس ریکارڈ کیا، جس کے نتیجے میں فی حصص آمدن (EPS) 23.01 روپے رہی۔بورڈ کی سفارشات پر حصص داران نے مالی سال 2025-2024 کے لیے فی شیئر 3 روپے (30 فیصد) حتمی کیش ڈیویڈنڈ کی منظوری بھی دے دی۔ اس کے علاوہ AGM میں مالی سال 2026-2025 کے لیے بیرونی آڈیٹرز کے طور پر میسرز اے ایف فرگوسن اینڈ کمپنی، چارٹرڈ اکاونٹنٹس کی دوبارہ تقرری کی منظوری بھی دی گئی۔
سال کے دوران نمایاں کامیابیوں میں UFG والیوم کے نقصانات میں کمی شامل رہی، جو 31,317 ایم ایم سی ایف سے کم ہو کر 30,026 ایم ایم سی ایف تک آ گئ۔ یہ کمی TBS پر مبنی مائیکرو مینجمنٹ اقدام، مانیٹرنگ اور سرویلنس کے بہتر انتظامات، حساس علاقوں میں نگرانی میں اضافہ، لیکیج کی بروقت نشاندہی اور مرمت، اور Measurements سسٹمز میں مسلسل بہتری کے باعث ممکن ہوئی۔اجلاس میں حصص داران کے ساتھ ایک سوالات و جوابات کا سیشن بھی شامل تھا، جس میں تعمیراتی نوعیت کی آرا پیش کی گئیں۔ تمام سوالات کے تفصیلی اور تسلی بخش جوابات دیے گئے، اور شرکا نے اطمینان کا اظہار کیا۔اجلاس کی صدارت چئیرمین بورڈ آف ڈائریکٹرز اسماعیل قریشی نے کی۔
اجلاس میں شریک دیگر ڈائریکٹرز میں سعادت علی خان، محترمہ فاریہ رحمان صلاح الدین، اور احمد چنائے شامل تھے۔ اس کے علاوہ مینیجنگ ڈائریکٹر عامر طفیل، ڈی ایم ڈی (Services) فیصل اقبال، ڈی ایم ڈی (Operations) ثاقب ارباب، CFO کامران اکرم، اور SGM (کارپوریٹ افیئرز) کمپنی سیکرٹری امتیاز محمود بھی اجلاس میں موجود تھے۔دیگر ڈائریکٹرز، طارق اقبال خان، سجاد اظہر، اور جواد پال خواجہ نے ویڈیو لنک کے ذریعے اجلاس میں شرکت کی۔ کمپنی کی سینئر مینجمنٹ بھی AGM میں شریک ہوئی۔