دبئی: خلیج خطے کی سب سے بڑی ٹی20 کرکٹ لیگ ڈی پی ورلڈ آئی ایل ٹی 20سیزن 4 کا آغاز 2 دسمبر کو ہوگاجو کہ یواے ای کا قومی دن بھی ہے۔ شائقین کے لیے سب سے دلچسپ لمحہ عالمی شہرت یافتہ گلوکار علی ظفر کی شاندار پرفارمنس ہوگی جو لیگ کے افتتاحی دن کی تقریب کو چار چاند لگا دے گی۔
تقریب دبئی انٹرنیشنل اسٹیڈیم میں شام 6 بجے شروع ہوگی، جبکہ پہلا میچ 6بجکر 45منٹ پر کھیلا جائے گا، جس میں گزشتہ سال کے چیمپئن دبئی کیپٹلز اور فائنل کے رنرز اپ ڈیزرٹ وائپرز مدمقابل ہوں گے۔اسٹیڈیم کے دروازے افتتاحی تقریب اور پہلے میچ کے لیے شام 4 بجے کھلیں گے۔ شائقین اب مختلف کیٹیگریز کے ٹکٹ حاصل کر سکتے ہیں، جن کی قیمت 20 درہم سے شروع ہو رہی ہے جبکہ ہاسپیٹالیٹی پیکجز 325 درہم سے دستیاب ہیں۔ نئے سِکسز لاؤنج تجربے کے لیے ٹکٹ 395 درہم میں دستیاب ہیں جس میں لامحدود کھانا اور مشروبات شامل ہیں۔
ٹکٹ خریدنے کے لیے tickets.ilt20.ae یا ورجن میگاسٹورز کا رخ کیا جا سکتا ہےڈی پی ورلڈ آئی ایل ٹی 20کے سی ای اوڈیوڈ وائٹ کا کہنا تھا کہ ہم سیزن 4 کے شاندار آغاز کے لیے بہت پرجوش ہیں۔ یہ ہمارے لیے فخر کی بات ہے کہ ہم یواے ای کے قومی دن کی تقریبات کا حصہ بنیں۔ افتتاحی تقریب اور علی ظفر کی پرفارمنس شائقین اور دنیا بھر کے ناظرین کے لیے یادگار لمحے فراہم کرے گی، جس کے بعد پہلے میچ کی دلچسپ کرکٹ ایکشن بھی شروع ہوگی۔پاکستانی گلوکار علی ظفر نے کہا کہ دبئی میں اپنے شائقین کے سامنے پرفارم کرنا ہمیشہ خوشی کا لمحہ ہوتا ہے۔ میں اپنے نئے البم ’’روشنی ‘‘کے چند گانے بھی پہلی بار دبئی میں پیش کروں گا اور شائقین کے لیے یہ تحفہ ہوگا۔افتتاحی تقریب میں یواے ای کے قومی دن کے تھیم پر مبنی رنگین آتشبازی کا شاندار مظاہرہ بھی شامل ہوگا۔
