اسلام آباد(ایڈیٹر انوسٹی گیشن)سی ڈی اے لینڈ ڈائریکٹوریٹ سے دھماکہ خیز خبر، 3 ارب سے زائد مالیت کے فارم ہاوسز کی دو نمبر الاٹمنٹ کی کہانی سامنے آ گئی ۔سی ڈی اے لینڈ ڈائریکٹوریٹ نے 5فارم ہائوسز کورٹ سے ڈگری ہونے کے بعد الاٹ کئے ،جبکہ ڈگری کروانے میں مبینہ طور پر چند وکلا ، سی ڈی اے لا ڈائریکٹوریٹ کے عملے کی ملی بھگت کے شبے کے بعد ڈی جی لا ڈائریکٹوریٹ نعیم اکبر ڈار نے ذاتی طور پر معاملے میں دلچسپی لی
مبینہ طور پر بتایا جا رہا ہے کہ فراڈ الاٹمنٹ کرنے کیلئے ریکارڈ میں 50کنال کو 500کنال زمین میں تبدیل کیا گیا ، ان فارم ہاوسز میں مین مری روڈ پر واقع فارمز ہاوسز پلاٹ نمبر 38،40، 59،66 اور 66اے شامل ہیں ، ریکارڈ کی ٹیمپرنگ اور ملی بھگت سے عدالت سے پلاٹس کی ڈگری کروائی گئی، چیئرمین سی ڈی اے کو تحریری شکایت موصول ہونے کے بعد اس معاملے پر تحقیقات شروع کروائی گئیں جس کے بعد ریکارڈ میں ٹیمپرنگ ثابت ہو گئی ، تاہم ڈی جی لا ڈائریکٹوریٹ کی کوششوں سے ڈگری کینسل کروا لی گئی ہے جبکہ حمیرہ ارشاد ڈپٹی ڈائریکٹر جنرل ریسورسز اور ڈائریکٹر اسٹیٹ اینڈ مینجمنٹ ٹو شکیل احمد پر مشتمل فیکٹ اینڈ فائنڈنگ انکوائری کمیٹی بھی تشکیل دیدی گئی ہے ، 2رکنی کمیٹی اسلم جمیل کے کردار کا تعین کریگی جبکہ سابق اسسٹنٹ ڈائریکٹر لینڈ عرفان احمد کے کردار کا بھی تعین کیا جائے گا۔
یہ امر واضح ہے کہ سابق اسسٹنٹ ڈائریکٹر لینڈ عرفان احمد نے عدالت کے سامنے پیش ہو کر سی ڈی اے کے خلاف بیان ریکارڈ کروایا تھا ، کمیٹی کو 3دن میں اپنی تحقیقات مکمل کرنے کے احکامات جاری کئے گئے ہیں ۔
