جدہ(خالد نواز چیمہ)ٹیکنیکل ایجوکیشن اینڈ ووکیشنل ٹریننگ اتھارٹی (TEVTA) کے اعلی سطحی وفد نے جدہ میں اسکانکم کا دورہ کیا، جہاں پاکستان سے تربیت یافتہ ہنر مند افرادی قوت کی سعودی عرب میں شمولیت کے حوالے سے اہم امور پر گفتگو ہوئی۔ اس موقع پر ڈائریکٹر جنرل آپریشن TEVTA، عامر عزیز نے کہا کہ پاکستان میں فنی تعلیم یافتہ افراد نہ صرف ملک میں بلکہ بیرونِ ملک بھی ممتاز کارکردگی کا مظاہرہ کر رہے ہیں۔ لاکھوں نوجوان TEVTA کے تحت مختلف کورسز مکمل کر کے باعزت روزگار حاصل کر رہے ہیں۔
اسکانکم کی جانب سے سی سی او چوہدری انصر محمود ایڈووکیٹ، منیجنگ ڈائریکٹر زریاب محمود اور ایچ آر ڈائریکٹر وقار ارشد نے وفد کا خیرمقدم کیا، جبکہ TEVTA کی طرف سے ایڈیشنل ڈی جی پلیسمنٹ معاذ سلیم اور ڈپٹی ڈائریکٹر پلیسمنٹ بھی ملاقات میں شریک تھے۔
عامر عزیز نے بتایا کہ TEVTA ملک بھر میں سینکڑوں شعبوں میں فنی تربیت فراہم کر رہا ہے تاکہ میٹرک پاس نوجوان بھی اپنے پسندیدہ شعبوں میں ہنر حاصل کر کے روزگار پا سکیں۔ انہوں نے کہا کہ TEVTA کا سرٹیفیکیٹ نہ صرف پاکستان بلکہ خلیجی ممالک میں بھی نمایاں اہمیت رکھتا ہے، اور تربیت یافتہ افراد کے لیے بیرون ملک روزگار کے مواقع مزید آسان ہو رہے ہیں۔
ملاقات میں اس بات پر بھی خصوصی گفتگو ہوئی کہ TEVTA اور اسکانکم کا الحاق دونوں ممالک کے درمیان ہنر مند افرادی قوت کی فراہمی کے نئے مواقع کھولے گا، جس سے سعودی عرب کی مارکیٹ کو معیاری ٹیلنٹ دستیاب ہوگا۔ آخر میں TEVTA کے وفد نے پاکستان انویسٹرز فورم کے لیے دوسری بار صدر منتخب ہونے پر اسکانکم کے جنرل منیجر شفقت محمود کو مبارک باد پیش کی اور نیک خواہشاتکااظہارکیا۔
