سب سے امیر فلپائنی ارب پتی نے صرف چار دنوں میں اپنی 18 ارب ڈالر کی دولت کھو دی!

فلپائنی ارب پتی مانوئل ویلار نے صرف چار دنوں میں اپنی 18 ارب ڈالر سے زیادہ کی دولت اس وقت کھو دی، جب اُس کی رئیل اسٹیٹ کمپنی گولڈن ایم وی ہولڈنگز کے شیئرز گزشتہ جمعرات سے اب تک 83 فیصد کی ریکارڈ کمی کا شکار ہوئے۔یہ کمپنی کی تاریخ کی سب سے بدترین گراوٹ ہے۔
عرب میڈیا کے مطابق کہانی اس وقت شروع ہوئی جب ریگولیٹری حکام نے کمپنی کے شیئر پر چھ ماہ سے عائد ٹریڈنگ پابندی ختم کر دی۔ جیسے ہی شیئر کی ٹریڈنگ دوبارہ شروع ہوئی، قیمت تیزی سے گرنے لگی اور ویلار فلپائن کے امیر ترین شخص کے منصب سے نیچے آگئے۔ ان کی جگہ کاروباری شخصیت انریکے رازون نے لے لی۔ بلومبرگ کے ارب پتی انڈیکس کے مطابق ویلار کی دولت کم ہو کر تقریباً 4 ارب ڈالر رہ گئی ہے۔
بڑی گراوٹ کے باوجود کمپنی نے ریگولیٹری حکام کو دیے گئے اپنے متعدد بیانات میں کہا ہے کہ اسے شیئر کی قیمت گرنے کی کوئی وجہ معلوم نہیں۔
کمپنی نے میڈیا کی جانب سے کیے گئے سوالات پر بھی کوئی تبصرہ نہیں کیا۔ تاہم مارکیٹ کے ماہرین کا مؤقف مختلف ہے۔ “گلوبلنکس سیکیورٹیز” کے تجزیہ کار ٹوبی الان آرز کا کہنا ہے کہ سرمایہ کاروں نے ٹریڈنگ بحال ہونے کے بعد شیئر کی قیمت کا دوبارہ جائزہ لیا اور نتیجہ اخذ کیا کہ پابندی لگنے سے پہلے اس شیئر کی قیمت غیر معمولی حد تک بڑھا چڑھا کر پیش کی گئی تھی۔
ریگولیٹری اتھارٹی نے مئی میں کمپنی کے شیئر کی ٹریڈنگ اس وقت روکی جب کمپنی اور آڈیٹر کے درمیان اس زمین کی قیمت کے تعین پر تنازع پیدا ہوا، جسے ویلار نے 93 ملین ڈالر میں خریدا تھا۔
بعد ازاں کمپنی نے اسی زمین کی دوبارہ قیمت لگائی تو وہ بڑھ کر 23اعشاریہ3 ارب ڈالر تک پہنچ گئی۔ اس غیر معمولی اضافے نے مالی حلقوں میں شدید بحث چھیڑ دی، خاص طور پر اس لیے کہ یہ تبدیلی اس وقت ہوئی جب شیئر کی قیمت میں بے تحاشا اضافہ ہو چکا تھا، جس نے کمپنی کے پرائس ٹو ارننگ ریٹو کو 1000 گنا سے بھی زیادہ کر دیا تھا۔
ویلار اور ان کا خاندان کمپنی کے تقریباً 89 فیصد شیئرز کے مالک ہیں۔ کمپنی قبرستانوں، یادگار پارکس اور کم لاگت رہائشی منصوبوں کے علاوہ Villar Cityنامی ایک بڑے منصوبے کی بھی مالک ہے، جس کا مقصد مانیلا کے جنوبی علاقوں میں متعدد شہروں کو ایک نیا شہری مرکز بنانا ہے۔
بحران صرف “گولڈن ایم وی” تک محدود نہیں رہا بلکہ ویلار ایمپائر کی دیگر کمپنیوں کو بھی متاثر کر گیا۔ رئیل اسٹیٹ ڈویلپرVista Land Lifescapesکے بانڈز بھی گر کر مشکلات کا شکار ہو گئے اور 2029 میں میچور ہونے والے ڈالر بانڈز نے ایک مہینے سے زائد عرصے کے دوران سب سے بڑی یومیہ کمی ریکارڈ کی۔
اپنی حالیہ سالانہ رپورٹ میں “گولڈن ایم وی” نے تصدیق کی کہ کمپنی نے آڈیٹر کی تجویز کردہ نئی ویلیوایشن پالیسی کو قبول کرنے پر اتفاق کیا ہے، جس کے نتیجے میں زمین کی قیمت کم ہو کر اصل خریداری کے قریب آ گئی ہے۔