اسلام آباد (سب نیوز )وفاقی دارالحکومت اسلام آباد میں پہلے سیون اسٹارہوٹل کی تعمیر کے لیے تمام انتظامی و تکنیکی تیاریاں مکمل کرلی گئی ہیں۔ یہ شاندار منصوبہ آنے والے شنگھائی تعاون تنظیم (SCO) سمٹ کے دوران غیر ملکی معزز مہمانوں کی رہائش اور میزبانی کے لیے ترتیب دیا جا رہا ہے۔ذرائع کے مطابق کیپٹل ڈیولپمنٹ اتھارٹی (CDA) نے منصوبے کو تیزی سے آگے بڑھانے کے لیے بین الاقوامی سطح پر کمپنیوں کو باضابطہ طور پر مدعو کر لیا ہے۔
سی ڈی اے کی جانب سے جاری کیے گئے عالمی ٹینڈر میں بتایا گیا ہے کہ سیون اسٹار ہوٹل کی تعمیر انٹرنیشنل فرمز کے تعاون سے پبلک پرائیویٹ پارٹنرشپ یا مشترکہ منصوبے (Joint Venture) کے تحت کی جائے گی۔اس جدید ہوٹل کے لیے اسلام آباد کے حساس اور اہم ترین علاقے ریڈ زون کو منتخب کیا گیا ہے، جہاں دنیا کے دیگر دارالحکومتوں کی طرح اعلی معیار کی رہائشی و کانفرنس سہولیات فراہم کی جائیں گی۔
منصوبے کے تحت مجوزہ ہوٹل میں عالمی معیار کے بڑے کانفرنس ہالز، جدید سیمینار اور میٹنگ رومز، وسیع و عریض بینکوئٹ ہالز، مہمانوں کے لیے لگژری کمروں کا وسیع انتظام اور خصوصی طور پر سیکیورٹی کے جدید نظام کی تنصیب شامل ہے۔ اس کے علاوہ ایک وسیع ملٹی اسٹوری پارکنگ بھی تعمیر کی جائے گی تاکہ سفارتی وفود، سرکاری مہمانوں اور دیگر بین الاقوامی شرکا کو اعلی سہولیات بہم پہنچائی جا سکیں۔
سی ڈی اے حکام کے مطابق سیون اسٹار ہوٹل کا یہ منصوبہ نہ صرف پاکستان کے عالمی تشخص کو بہتر بنانے میں اہم کردار ادا کرے گا بلکہ دارالحکومت میں جدید طرز کی تعمیرات کے فروغ کا باعث بھی بنے گا۔حکام کا کہنا ہے کہ ایس سی او سمٹ کی میزبانی کے لیے ہوٹل کو جلد از جلد مکمل کرنا ترجیح ہے، تاکہ پاکستان آنے والے اعلی سطحی مہمانوں کو معیاری رہائش اور عالمی معیار کی سہولیات فراہم کی جا سکیں۔ سی ڈی اے حکام پراعتماد ہیں کہ سیون اسٹار ہوٹل کی تکمیل نہ صرف اسلام آباد کی خوبصورتی میں اضافہ کرے گی بلکہ پاکستان کی سفارتی سرگرمیوں میں بھی ایک مثبت اور مضبوط اضافہ ثابت ہوگی۔
