12

آرمی چیف سے امریکی نائب وزیر خارجہ کی ملاقات، افغان امور پرگفتگو

اسلام آباد، آرمی چیف جنرل قمر جاوید باجوہ نے کہا ہے کہ پاکستان افغانستان میں دیرپا امن و استحکام کے لیے تمام کوششوں کی حمایت کرتا ہے۔آئی ایس پی آر کے مطابق آرمی چیف جنرل قمر جاوید باجوہ سے پاکستان کے دورے پر آئی ہوئی امریکی نائب وزیر خارجہ وینڈی شرمین نے ملاقات کی۔
ملاقات میں باہمی دلچسپی اور علاقائی سیکیورٹی کی صورتحال پر سمیت افغانستان میں انسانی بنیادوں پر اقدامات اور امور پر تفصیلی تبادلہ خیال کیا گیا۔آرمی چیف نے اس موقع پر کہا کہ پاکستان افغانستان میں دیرپا امن اور استحکام کے لیے پرعزم ہے، افغانستان میں پائیدار امن کے لیے تمام کوششوں کی حمایت کرتے ہیں۔آرمی چیف نے زور دیا کہ تمام فریقوں پر مشتمل افغان حکومت کی حمایت کرتے ہیں، دونوں ممالک کے درمیان کثیرالجہتی تعلقات کے لیے بامقصد رابطوں کی ضرورت ہے۔ نائب امریکی وزیر خارجہ نے افغان صورتحال میں پاکستان کے کردار کو سراہا اور غیر ملکیوں کے انخلا میں پاکستان کے تعاون کی خصوصی تعریف کی۔ نائب امریکی وزیر خارجہ نے علاقائی امن کے لیے پاکستان کے ساتھ مل کر چلنے کے عزم کا اعادہ بھی کیا۔قبل ازیں امریکی نائب وزیر خارجہ وینڈی آر شرمن نے وفد کے ہمراہ وزارتِ خارجہ کا دورہ کیا، اور وزیرِ خارجہ شاہ محمود قریشی سے ملاقات کی، ان کے ہمراہ اسسٹنٹ سیکرٹری برائے جنوبی اور وسطی ایشیا مسٹر ڈونلڈ لو بھی تھے، اس موقع پر سیکرٹری خارجہ سہیل محمود اور وزارت خارجہ کے سینئر افسران بھی موجود تھے، اس ملاقات میں دوطرفہ تعلقات، افغانستان اور علاقائی امن سے متعلق امور پر تبادلہ خیال کیا گیا اور امریکی نائب وزیر خارجہ نے بلوچستان میں زلزلے اور جانی نقصان پر گہرے دکھ اور افسوس کا اظہار کیا۔ شاہ محمود قریشی کا کہنا تھا کہ افغانستان کے حوالے سے پاکستان اور امریکا کے نقطہ نظر میں ہم آہنگی موجود ہے، امید کرتے ہیں کہ افغانستان کی نئی انتظامیہ اپ امن اور استحکام کے ساتھ ساتھ تمام افغان عوام کی بہتری کے لیے کام کرے گی، افغان عوام کی نمائندہ اور وسیع البنیاد حکومت، بین الاقوامی برادری کے لیے قابل اعتماد شراکت دار ہو سکتی ہے۔ وزیرخارجہ نے کہا کہ عالمی برادری کی جانب سے انسانی امداد اور افغان پائیدار معیشت کی تعمیر کے لیے ٹھوس اقدامات کی ضرورت ہے، پاکستان، معاشی تعاون، علاقائی روابط کے فروغ اور خطے میں قیام امن کیلئے امریکا کے ساتھ وسیع البنیاد، طویل المیعاد اور پائیدار تعلقات کے قیام کا خواہاں ہے، دونوں ممالک کے درمیان باقاعدہ اور منظم ڈائیلاگ کا عمل ہمارے دوطرفہ مفاد کے ساتھ ساتھ مشترکہ علاقائی مقاصد کو فروغ دینے کے لیے بہت ضروری ہے۔ وزیر خارجہ شاہ محمود قریشی نے جنوبی ایشیا میں پائیدار امن اور استحکام کے لیے مسئلہ کشمیر کے منصفانہ حل کی اہمیت پر زور دیا، اور امریکہ کی جانب سے پاکستان کو دی گئی کووڈ سے متعلقہ معاونت پر نائب وزیر خارجہ وینڈی شرمین کا شکریہ ادا کیا۔ امریکی نائب وزیر خارجہ نے افغانستان سے انخلا میں پاکستان کی معاونت کو سراہا، اور پاکستان اور امریکا کے درمیان موسمیاتی تغیر اور متبادل توانائی کے حوالے سے دو طرفہ مذاکرات میں ہونے والی پیش رفت کی تعریف کی۔

اس خبر پر اپنی رائے کا اظہار کریں

رائے کا اظہار کریں