اسلام آباد(سب نیوز)پاکستان میں پرتگال کے سفیر پالو گوئیدیش دومینگیش نے یومِ پرتگال، کاموئیش اور پرتگالی برادریوں کے موقع پر اپنے خصوصی پیغام میں کہا ہے کہ پرتگال اور پاکستان کے درمیان دوستانہ، تعمیری اور باہمی احترام پر مبنی تعلقات موجود ہیں، جو مختلف شعبوں میں مسلسل فروغ پا رہے ہیں۔اپنے پیغام میں سفیر نے کہا کہ یومِ پرتگال، کاموئیش اور پرتگالی برادریاں پرتگال کی تاریخ، ثقافت، زبان اور قومی اقدار کے جشن کا دن ہے۔ یہ موقع عالمی ادب کی عظیم شخصیت لوئیس دی کاموئیش کو خراجِ عقیدت پیش کرنے کا بھی موقع فراہم کرتا ہے، جن کا ادبی ورثہ آج بھی پرتگال کی کشادہ دلی، جستجو اور بین الثقافتی مکالمے کی علامت سمجھا جاتا ہے۔
انہوں نے بیرونِ ملک مقیم پرتگالی برادری کو خراجِ تحسین پیش کرتے ہوئے کہا کہ دنیا بھر میں رہنے والے پرتگالی شہری اپنی محنت، صلاحیتوں اور وابستگی کے ذریعے نہ صرف اپنے وطن کی نمائندگی کرتے ہیں بلکہ مختلف اقوام اور ممالک کے درمیان مضبوط پل کا کردار بھی ادا کرتے ہیں۔سفیر پالو گوئیدیش دومینگیش نے کہا کہ پاکستان میں اس دن کی تقریبات منانا خصوصی اہمیت رکھتا ہے کیونکہ دونوں ممالک جغرافیائی فاصلے کے باوجود تاریخی روابط، تبادلوں اور بین الاقوامی تعاون، مکالمے اور باہمی احترام جیسے مشترکہ اصولوں سے جڑے ہوئے ہیں۔انہوں نے اس امر پر بھی روشنی ڈالی کہ پرتگال میں پاکستانی نژاد پرتگالی شہریوں کی تعداد میں اضافہ ہو رہا ہے، جو مختلف شعبوں میں پرتگالی معاشرے میں اہم کردار ادا کر رہے ہیں۔ ان کے بقول یہ کمیونٹی دونوں ممالک کے درمیان روابط اور دوستی کو مزید مستحکم بنانے میں اہم کردار ادا کر رہی ہے۔سفیر نے کہا کہ حالیہ برسوں کے دوران پاکستان اور پرتگال کے تعلقات سیاسی روابط، تجارت و سرمایہ کاری، تعلیم، ثقافت اور عوامی سطح کے تبادلوں سمیت متعدد شعبوں میں مثبت انداز سے آگے بڑھے ہیں۔ دونوں ممالک باہمی دلچسپی کے شعبوں میں تعاون کو مزید فروغ دینے اور نئی راہیں تلاش کرنے کے لیے پرعزم ہیں۔
انہوں نے اسلام آباد میں پرتگال کے سفارت خانے کے عملے کی پیشہ ورانہ خدمات کو سراہتے ہوئے کہا کہ ان کی مسلسل کاوشیں دونوں ممالک کے درمیان تعلقات کو مضبوط بنانے میں اہم کردار ادا کر رہی ہیں۔ انہوں نے کراچی میں پرتگال کے اعزازی قونصل فخر ایس ایازالدین اور لاہور میں اعزازی قونصل افتخار فیروز کی خدمات کو بھی خراجِ تحسین پیش کیا، جو پاکستانی اداروں، کاروباری حلقوں اور شہریوں کے ساتھ تعلقات کے فروغ میں نمایاں کردار ادا کر رہے ہیں۔سفیر نے پاکستانی حکام، سفارتی برادری، کاروباری، تعلیمی اور ثقافتی حلقوں، ذرائع ابلاغ اور پرتگال کے دوستوں کا شکریہ ادا کرتے ہوئے کہا کہ یہ سب افراد دونوں ممالک کے درمیان موجود دوستی اور مستقبل میں مزید مضبوط شراکت داری کے مشترکہ عزم کی نمائندگی کرتے ہیں۔اپنے پیغام کے اختتام پر انہوں نے کہا کہ آج پرتگال کا جشن مناتے ہوئے ہم پاکستان اور پرتگال کی دوستی اور ان مشترکہ اقدار کا بھی جشن منا رہے ہیں جو ہمیں ایک دوسرے کے قریب لاتی ہیں، جن میں احترام، مکالمہ، تعاون اور باہمی مفاہمت شامل ہیں۔انہوں نے کہا پرتگال زندہ باد، اور پاکستان و پرتگال کی دوستی پائندہ باد۔
