اسلام آباد(آئی پی ایس)وزیراعظم محمد شہباز شریف کی زیر صدارت بجلی تقسیم کار کمپنیوں (ڈسکوز) کی نجکاری کے حوالے سے جائزہ اجلاس منعقد ہوا، جس میں نجکاری کے عمل اور پیش رفت کا تفصیلی جائزہ لیا گیا۔
اجلاس سے خطاب کرتے ہوئے وزیراعظم نے کہا کہ خسارے کا شکار ریاستی ملکیتی اداروں کی نجکاری حکومت کی ترجیح ہے۔ انہوں نے بجلی تقسیم کار کمپنیوں کی نجکاری کے عمل کی رفتار تیز کرنے اور تمام مراحل انتہائی شفاف انداز میں مکمل کرنے کی ہدایت کی۔ وزیراعظم نے یہ بھی کہا کہ ڈسکوز کی نجکاری کے بعد ایک مضبوط ریگولیٹری فریم ورک تشکیل دیا جائے۔
اجلاس کو بریفنگ میں بتایا گیا کہ نجکاری کے پہلے مرحلے میں اسلام آباد الیکٹرک، گجرانوالہ، فیصل آباد الیکٹرک سپلائی کمپنی کی نجکاری کی جائے گی۔
بریفنگ کے مطابق ان تینوں ڈسکوز کی نجکاری کے لیے ایکسپریشن آف انٹرسٹ ملکی اور بین الاقوامی اخبارات میں جاری کیا جا چکا ہے، جبکہ کابینہ کی نجکاری کمیٹی ان کے ٹرانزیکشن اسٹرکچر کی منظوری بھی دے چکی ہے۔
اجلاس کو مزید بتایا گیا کہ سرمایہ کاروں کو راغب کرنے کے لیے روڈ شوز کا انعقاد اسی ماہ شروع کیا جا رہا ہے، جبکہ Saudi Arabia، Türkiye اور China کے سرمایہ کاروں کے لیے بین الاقوامی سطح پر بھی روڈ شوز منعقد کیے جا رہے ہیں۔
اجلاس میں نائب وزیراعظم و وزیر خارجہ اسحاق ڈار، وفاقی وزیر خزانہ محمد اورنگزیب، وفاقی وزیر پاور ڈویژن سردار اویس لغاری، مشیرِ وزیراعظم برائے نجکاری محمد علی، وزیر مملکت بلال اظہر کیانی اور دیگر اعلیٰ حکام نے شرکت کی۔
